KI UMMAT KSIAR JONG PHI


Ban sah ryngkat, bad phi hangne ,
Ko ieid, ngam sngew mon shuh ;
Sha sla pyrthei, ngan hiar sha thie ,
Na phi ban khlad jynduh .


Ka thie hangthie, ka thei bhabriew ,
Ba palat liam shisha ;
Ym don u wei, na sla khyndew ,
Ban ryngkat dor bad ka .


Sa tang ma nga, u biang rynïeng ,
Ba bit ka dur ka dar ;
Ngan hiar ma nga, nangne na bneng ,
Pyrthei kan risa, ïar .


Phin khang pyrshah, phin bynnud lei ,
Ngan ieh noh, te ïa phi ;
Ka thei bhabriew, hana kam dei ,
Ban lei phin kren bishni ?


Mynta kumne, shen ngan leit noh ,
Sha phi shuh, ngam phai biang ;
Arsut ngan thung, shathie shapoh ,
Shaba mynsiem ka sliang .


Khlem phai dien shuh, tang shisien ruh ,
Nga kmen bad phuh samrkhie ;
Shadem kyndeh, sngew kum ban pluh ,
Ban ïoh poi noh hangthie .


Tang poi hi tiap, nga shaïong ngaiñ ,
Kum biej shu ang tyngheng ;
La shet la phon, ka dur khlem raiñ ,
Nga duh la jingieid bneng .


Ah! kum kaei ? kane ah Blei !
Hangne, nga shem mynta ;
Ka ‘per tyrso ! ka briew kam dei ,
Ka pap aïu ïa nga ?


Sa shisien pat, shano ngan phai ?
Khyrdop lynti la khang ;
La dkut jyngkieng, jingieid janai ,
Mynsiem ka pait ka pdang .


Nga la ñiew beiñ, jingieid ka Sngi ,
Bainong pura nga ïoh ;
Marwei nga ieh, ka ïam bapli ,
Ïa ka ym don ba khroh .


Jingieid nylla ba sngur ba tlem ,
Shirta junom nga duh ;
Ïa phi ko Sngi, ko kutshadem ,
Da leilei ngam ïoh shuh .


Tang jingkynmaw, junom shirta ,
Ko syiem jingshai, ko Sngi ;
Bad jingbabe, kin sah ha nga ,
Ki Ummat Ksiar Jong Phi .


Ah ! Ko Klow.. Lowlowlow..low….

I TIEW AÏU PHIN SIEN ÏA I ?

I TIEW AÏU PHIN SIEN ÏA I ?

Lasubon ne Tiew Dohmaw ,

Tiew Lili ne Tiew Lyngskaw ;

Tiew Lyngksiar ne Tiew Kulab ,

Shyrtong syiar ne Kjat-tyngab ;

Lamatïong ne Lapongnai ,

Tiew Shyllong ne Tiew Diengngai ;

Khaila ksiar ne Knupmawïang ,

Tiew Tdong syiar ne Jami-ïang ;

Tiew Riamskaiñ ne Tiew Thohbria ,

Tiew Myngngor ne Latana ;

Tiew Lalyngksiang ne Tiew Sngi ,

Tiew Lasier ne Lalyngngi ;

Tiew Jngem-snam ne Tiew Pathaw ,

Tiew Jakhei ne Tiew Jaïaw ;

Tiew Pylleng syiar ne Tiew Phlang ,

Jatur ïeng ne Tiew Japang ;

Tiew Kot ne Myngngor longsyiem ,

Lynniang eit-saw ne Tiew Shlim ;

Tiew Tyrdip ne Syndormat ,

Tiew Sien aiom ne Tiew Eit ;

Tiew Lakud ne Tiew Diengsong ,

Tiew Tyrkhang ne i Tiew Klong ;

Tiew Hurkum ne Tiew Langshyieng ,

Tiew Rynsun ne i Tiew Rieng ;

Tiew Sying ne i Tiew Shyrngan ,

Tiew Jarem ne i Tiew Phan ;

Tiew Jaiñ ne i Tiew Ko-ko ,

SA ÏAMON ÏA JIED HI MO….

WAH JYMBAN (RANGTHYLLIANG)

Titanic Maw at Wahshiangliar Umniuhtmar

KA LA BIANG IA NGA

KA LA BIANG IA NGA

Balei ngan bynnud sah,

Ia jingieid jongphi;

Haba nga hi ngam lah,

Ban pynhun iaphi.

Ka bha ba phin klet noh,

Shisyndon ia nga;

Nga ruh ngam sngewlyngngoh,

Ban dang sngewphylla.

Iaphi nga la ieid hok,

Da jingieid shisha;

Tangban kmen maphi ieid,

Ka la biang ia nga.

Ka la biang ia nga,

Ka la biang ia nga;

Tangban kmen maphi ieid,

Ka la biang ia nga.

Pyrthei jongnga ka dum,

Phi tip ia kata;

Pyrthei jongphi ka shai,

Baroh ki tip bha.

Lawei jongphi kan bha,

Ngan kitbok ma nga;

Ngam kwah phin im khuslai,

To tip ia kata.

Iaphi nga la ieid hok,

Da jingieid shisha;

Tangban kmen maphi ieid,

Ka la biang ia nga.

Ka la biang ia nga,

Ka la biang ia nga;

Tangban kmen maphi ieid,

Ka la biang ia nga….

NGA KHLEM DA KHAN (A Khasi vernacular Poetry)

NGA KHLEM DA KHAN

Nga khlem da khan da mut,
L’u ‘lok ba ju ïa shem,
Ba ‘tiew dieng-ngai in bud,
Bad jingiewbih ba dem,

Shi kham b’u pan sngewbha,
Da mynsiem sngur nga ai,
Nga khlem da thew shata,
Ban sieng i ‘tiew dieng-ngai,

Hadien ar sngi kynthih,
Ha tyntong shkor jongnga,
Ba sieng i ‘tiew iewbih,
Ha miej jongphi hangta,

Hangne ka pyn kynmaw,
Ïa sngi kiba thiang tam,
Mynba ki jingsngewblaw,
Ha dohnud kim pat ngam,

Mynba mynsiem ka kmen,
Ka kyndeh tang ban ‘i,
Mynba dohnud ka tngen,
Hapneh jingieid jongphi,

Kumta ki jingkhublei,
Sh'U Blei ngin ai kyrpang,
Lyngba ummat b’la shlei,
Dohnud jongngi la phrang,

Hynrei i ‘tiew dieng-ngai,
Wat la in sieng ïaphi,
Ki khmat sha u in phai,
Ba pyrthei lah sakhi.

KA SHNONG U MAWLYNNONG (A Khasi vernacular Poetry)

KA SHNONG U MAWLYNNONG

Na them Riwar mih ‘ngi,
Nangthie na nongkyndong;
Da jingsngur ka pyn i,
Ka shnong u mawlynnong;

Ba jingkhuid jingsuba,
Ka mih ka hiar phyllaw;
Na dpei jongki nangta,
Ka pur ki shnong ki thaw;

Ka tuid kan hiar arsut,
Sha ki thie bah jylliew;
Sha ki sngi jngai bym kut,
Na ïing ki khun ki ksiew;

Ban kiew ka Ri sha jrong,
Ban ïar akor burom;
Ban bha ki Raid ki Shnong,
Ba sngur kan sah junom;

Ka khot ïaphi ïa nga,
Da mynsiem sngur palei;
Ïa jingkhuid ba shisha,
Naduh dohnud ban tei;

Da ki khung bah ka song,
Nongrim ban saiñ pyrkhat;
Ka shnong u mawlynnong,
Nuksa ba bha ka shat.

I ‘ÑIANG KONGWIENG (A Khasi vernacular Poetry)

I ‘ÑIANG KONGWIENG

Marwei nga long i ‘ñiang kongwieng,
Nga im khlem jingkhuslai;
Nga dem rieh tngen ha krung u dieng,
Ryngkat ka siaw ka rwai;

Nga shang ki lum nga krih ki them,
Kylleng nga her bam lyer;
Ngam klet ban rwai haba nga dem,
Nga sngap haba nga her;

Nga kjit ki um ba bang ba thiang,
Ba sngem ha ki ñiut dieng;
Ha pneh jingthum ka Mei mariang,
Nga im nga phuh nga phieng;

Ka sur la jong nga sngew sarong,
La kpoh thylli suda;
Kumba la buh la mang nga long,
Ei ei nga khlem pyrwa;

Bishni pihuiñ ha nga kam don,
La ki para jingthaw;
Nga siaw nga rwai hala ka mon,
Ha ki rud nong ki khlaw;

Ïa sur kiwei ngam nang pynbud,
Nga ieid ka sur la jong;
Hala ki sngi ngan ïai kynud,
La ha ri them ri jrong.

LA KA JONG NGI BEIÑ EIT (A Khasi vernacular Poetry)

LA KA JONG NGI BEIÑ EIT

La ngi ïaid man ka sngi,
Na ka juh ka lynti;
Hynrei em ngim treh peit,
La ka jong ngi beiñ eit;

Lehraiñ ruh ban pyrkhat,
Nai ong lei ban ïuhkjat;
Ban leit kai tang hangthie,
Em hana ba sam prie;

Ïa mynta kiew hati,
La nym wei sha delhi;
La ar snem sha kuwa,
Lai snem lei rung bangla;

Sha nongwei te bang eh,
La ka jngai ngi ïa beh;
La ka jong ngi kheiñ poh,
Bad ka beiñ ka kynnoh;

Haba peit tangba peit,
Lehnoh ei long thylli;
Ym da mon kaba beit,
Kumno keiñ ban ïohi;

Ah! sangsot kum ïa ngi,
Hala shnong jah lynti;
Khlem da ñiewkor ïa ka,
Sah matlah khlem anna.

HARUM KA KSHAID U REN

HARUM KA KSHAID U REN

I ei i ne ba paw,
I dei i Puri Maw ?
I mat ym don ba ‘i,
Bym sngew khana lorni;

Harum ka Kshaid U Ren,
Shu shondur kai myllen;
Phang diang da kiew na thie,
Phang mon da hiar pat de;

Na pdeng ki hynñiew ngut,
Lai ngut ki la sah kut;
Hangne shiteng lynti,
Nonglam bad ‘lok jongngi;

Saw ngut ngi jam sha khmat,
Ngi kiew mawbah sohsat;
Ki ‘lok ba stad jongnga,
Lynti ki wad hi sia;

La kpoh ka kynruh thngan,
La jur jingthait ka ban;
Sha trai ka kshaid ban poi,
Jingthrang nang ïai kyrsoi;

Khatduh poi tiap ha shen,
Ha thwei ka Kshaid u Ren;
Ka lyer ka beh bun jait,
Hangta ngi shong jah thait.

KO SIM BARIT POITRI (A Khasi vernacular Poetry)

JING ÏA TIP LEM, IEID PARA MYNSIEM

KO SIM BARIT

Ko Sim barit ba rwai,poitri khasi
Ba kynud sur dang step;
Balei kumne rathai,
Phi ïeng bad kïuh kep kep;

Ka pap aïu phi leh,
Kumne ban hap madan;
Sha jrong phim lah kaweh,
Thapniang ki tlot kyrshan;

Shaei phi mut ban her,
Balei bakla lynti;
Katne u slap ka lyer,
Wow ‘i synei ïaphi;

Yn nai da syier da smiej,
Ngan ‘rap ïaphi mynta;
Wat nym lehraiñ tieng biej,
Ngam dei u thlen u khla;

Nga long u khun bynriew,
Para jingthaw ba im;
Yn nai pyrkhat mut sniew,
Nga ieid para mynsiem;

Ngi im ha pneh mariang,
Bad jingthaw laiphew jait;
Da jing ïarap kylliang,
Shipa shijot ngi lait;

Kumne ngan pynsyaid lem,
Wat khih na kti jongnga;
Da ar ki lynghoh rhem,
Haduh phin da syaid bha;

Ei ei ngam khmih lynti,
Ba phin dang siew kylliang;
Ka dei kabok jongphi,
Kumne ba phin khlaiñ biang;

Sa shisien keiñ phin pïer,
Mynta phi la syaid pat;
Shaba phi mon ban her,
Khie leit ïaphi ngam bat;

Wat klet kane kawei,
La ha i skum ki krem;
Jingsngew nguh ai sh’U Blei,
B’u la leh synei lem.